مش عايزة فلوس فى البنك
مش عايزة فيلا فى مارينا
مش عايزة عربية اخر موديل
مش عايزة حاجة من الدنيا
غييييييييييير
كتاب ربنا ورضاة عنى عشان احس انى عايشة بفايدة
غير حبيب يحن عليا ومكان يجمعنى بية ورغيف عيش اقسمة انا وهو والحبيب والعيش فى الزمن دة صعب ان الواحد يلاقيهم
غير مرايا تقولى انى جميلة واحس انها بتكدب عليها واكسرها عشان احس براحة زى المسلسلات كدة
غير مج نسكافية عشان اصحصح اول ما اقوم من النوم
غير الوان شمع الون بيها حياتى وقت ما انا عايزة
غير اوضة صغيرة يكون فيها اربع جدران وشباك صغير ووردتين وشريط لفيروز عشان لما احب اهرب من كل الناس ولما احب اكلمهم افتح الشباك واسلم على الدنيا ببسمة وفرحة على وشى
غير صباع روج عشان اكتب كلمة بحبك على المرايا وقت ما تتكتم الكلمة جوايا ومقدرش اقولها
غير ورقة وقلم عشان اطلع احاسيسى فيهم واشخبط شخابيط وارسم بلالين وايس كريم وشجرة تحتها ولد وبنت بيحبوا بعض
غير ديوان لفاروق جويدة عشان احس ان فيه حد عارف معنى الحب وعارف فعلا يحسسنى بية
غير سما صافية ورملة صفرا وهوا نقى وبحر ازرق ودنيا واسعة
غيرطفلة صغيرة تحبنى واحبها وتبقى كل دنيتى
غير نجوم بتلألأ فى السما وقمر مدور بيفكرنى باللى بحبه
ومافيش مانع لو برضة لقيت فلوس وعربية وفيلا هههههههه زيادة الخير خيرين برضة
كنت بقول انى مش عايزة حاجة من الدنيا بس فى الاخر اكتشفت انى عايزة كل الدنيا
الاحلام عمرها ما بتنتهى حتى لو حققناها بتحلموا زييى ولا شكلى بحلم لوحدى فى الدنيا دى
ااااةةةةةةةةة ياحلمى البعيد مليت من الأنتظار
هناك 34 تعليقًا:
للأسف الإنسان عبارة
عن مجموعه احتياجات
كل منسد طلب
يطلع واحد جديد
و هكذااااا الحيااااة
ربنا يرزقك و ينولك
اللي في نفسك
فكرة البوست هااايلة
إحترامي
مش عايزه
لا عايزه
احنا كدا
بناخدها واحده واحده لحد مانعوز كل حاجه ربنا ينولك الخير ويرضيكي بيه
مفيش حاجة اسمها مليت من الانتظار ... كده غلط ... كلنا بنحلم بس الشاطر اللي يحلم عشان يحقق حلمه ، والفاشل اللي يحلم عشان يهرب من الواقع وخلاص ،
لو بطلنا نحلم نموت
لو عاندنا نقدر نفوت
احلامك بسيطة وتعبيرك إن انتي عايزة الدنيا كلها مش كتير لان الدنيا كلها واضح انها بالنسبالك بسيطه
اما بالنسبة للفلوس والعربيه فاحلمي ببكرة إنك تلاقي الفنوس
تحياتي
والعيش فى الزمن دة صعب ان الواحد يلاقيهم
-----------------------
من حيث صعب فهو صعب جداااا
اما من حيث ان احلامنا مبتنتهيش فبجد انتى عندك حق
حتى لو كانت احلامك بسيطه تلاقى حاجات كتيره اوى تتدخل عشان تضخم احلامك دى وت خليها تكبر لغايه ماتنفجر
وفى الوقت ده تكرهى حلمك وتتمنى لو مكنتيش حلمتيه
بجد اجمل شىء فى الدنيا اننا نتمسك باحلامنا الصغيره ونحققها
احلامك علي ماقدر انها بسيطة إلا انها فعلا جميلة ومن حقك
من حق اي واحد فينا يحقق احلامه
تحياتي لك
بجد انا بهنيك على القناعه دى ربنا يكرمك ويثبتك
عارفه انت بتقولى كلام اانا علطول متفقه معاك
بس ممكن نتختلف برده فى الرأى عادى
عارفه اللى احنا وخدينا من الدنيا احنا عملنا وحش ولا لا
احنا لا هناخد فلا ولا عربيه ولا بيت
انا هناخد احنا عملنا كويس ولالا
فكرتك وصلت ودمت رقيقه قنوعه
تحياتى ولاء
هههههههههه واللهى لو على الراجل هاتقسمى معاه رغيف العيش هاتلاقيهم واقفين طوابير طوابير على افران العيش
بهرج طبعا
بس لفت انتباهى شىء خطير بل هو هيا مصيبه يا بنيتى
بطلى تنتظرى ...
اكسرى بايدك المرايه الى بتشوفى فيها ملامحك كل يوم
بايدك واخترقى كل دا وشوفى ايه الى وراه
بصراحه كل الى اقصده ان دا حاجز نفسى لازما نكسره وكفايا انتظار
خدى خطوه لقدام
تحياتى يا مولاتى
يا ستى احلمى بس خليكى متواضعه بلاها الفيلا و العربية و خليكى فى العيش و الانسان اللى يقدرك و تحسى معاه انك فعلا احلامك بسيطة بيت يجمعكم و بنوتة تكون كل دنيتكم و ان شاء الله كل اللى بتحلمى بيه يتحقق الصبر جميل
كلنا عندنا احلام و اهمها ربنا يرضى عننا كلنا
تحياتى
أنا نفسى فى مليون دولار وقصر فى أسكندرية وعشة فى رأس البر وأد خمس ست عربيات بورش على لامبورجينى على كريزلر
وأربع عرايس .... !!!!
أعتقد أن حلمى متواضع قوى موش كدة ؟
تحياتى
مهما طال الانتظار هيجى الحلم صدقينى
فجاه هتلاقيه جه
عوزه اقولك حاجه
انا اسفه فعلا لانى مش بتابع المدونه
مش بدخل مدونات كتير لانى عمله منتدى
لكن يكفينى تعبيرى بالاعجاب لمدونه بوضعها فى المفضله عندى
بجد مدونتك جميله ورقيقه بالتوفيق
رغم ان كل كلمة قولتيها حلوة.
ورغم ان كل اللي اتمنيتيه أنا كنت ولا زلت بتمناه.
لكن يا أختي العزيزة
الحياة عمرها ما حتديلك اللي بتحلمي بيه ، صدقيني عن تجربة الحياة مختلفة عن كل ما بنتمناه.
كنت زيك بحلم، بس الحلم حاجة والحياة حاجة تانية خالص
وفي النهاية ربنا يديلك اللي انتي عايزاه
أخوكي أبو الأنوار
ومنتظر زيارتك
حاجات بنحلم بيها
وحاجات بتحلم بينا
واللي بنجري عليها
بنلاقي غيرها تجينا !
الاحلام شيء جميل اوي ، ومن غيرها بجد مش هنعيش ، وانتي احلامك صافيه وجميله وبسيطه في نفس الوقت ، كلنا احلامنا كده ، بس في ناس بيحققوا احلامهم ، وفي ناس بينسو احلامهم ، وفي ناس احلامهم (مع ايقاف التنفيذ ) زي حالاتي كده
ربنا يكرمك يارب وتحققي كل احلامك :)
عجبني البوست بتاعك
ممكن اسميه ( دعوة للقناعة )
فكره حلوه جدا بجد تسلم ايدك
يا قمر
انتي قنوعة أوي ودي حاجة هايلة جدا طبعا .. بس بلاش تدخلي في التصوف والنبي ....
لذيذة فعلا مدونتك
استمري
تحياتي
بساطة الحلم
كنسيج الحرير الناعم
كروعة الحنين الدائم
هو قطرة عطر لأجلها تنتحر المدائن
الحلم وروعته أنه ليس مستحيل
بل يتحول الي نوع من الصبر الجميل
عزيزتي
كنت رائعه
تحياتي
ومين مش بيحلم كلنا بنحلم
الانسان من غير احلام يبقى شئ جامد مفيهوش احساس
تحياتى
كلنا بنحلم
وكل واحد عنده حلم نفسه يتحقق
الاحلام درجات....وتحقيق الاحلام ديه بايد ربنا سبحانه و تعالى
انا بقى دلوقتى نفس انام حالا...وبكره حقولك انا باحلم بايه
حلمت بالعريس...جه بس مش زى الحلم خااااااالص
حلمت يكون عندى اولاد...ربنا ما رادش
بكره حكملك الاحلام
ربنا يحققلك احلامك
اول مرة ازور مدونتك عجبتنى قوى
و البوست بتاعك جميل جدا
احلامك بسيطة و جميلة
ربنا يحققها ليكى ان شاء الله
فكرتيني بمقوملة بتقول
المرأة لا تطلب منك أي شيء
حتى إذا تملّكتك أخذت منك كل شيء
مع تحياتي
آدم
هههههههههههه
صدقى
وأنا كمان مش عايزه حاجه من الدنيا دى
هههههههههه
هى دي الحقيقه على فكره
انك بتكتشفى انك هاتفضلي طول عمرك عندك احلام واحتياجات
بس على فكره ده مش وحش لانك لو بطلتى تحلمى وتحتاجي هاتفقدى اصلا الرغبه فى الحياه عموما
تحياتي لك على البوست وعلى الكلام الجميل
لأ، إنتي كده تبقي مش زي كل البنات خااالـص ، وإن كنت برضو شايف إن فيه بنات كثير بتفكر زيك كده، ودول طبعًا بيبقوا أحلى بنات :)
.
.
ولســـه الأحلام كثييير، بـس إنتو تحلمو
.
تحياتي، ومرور أول :)
عارفه انا بقى محتاج الحاجات الى فى الاول كلها بجد
طبيعة الإنسان اللي ربنا خلقه عليها
حياته محطات كل ما يوصل لمحطة يدور على اللي بعديها
آآآآآآآآآآه لو دنه مسافر جوه القطر من غير ما يستمتع بالرحلة و يعيش شوية في كل محطة
آآآآآآآآآه لو كان الهدف هو المحطة الجاية و أزاي يوصل بس
يبقى مفيش أصلا رحلة
و يا ريت ما ركب القطر
مش عارف ليه أحلامك سهلة و صعبة ف نفس الوقت
يمكن لو كانت صعبة بجد كانت تبقى أسهل
مش قادر أصدق أن الدنيا ممكن تدي للواحد سعادة كاملة حتى لو كانت حتة عيش حاف و لحاف
اه انا كمان عايزة كل ده بالاضافة الى فيلا في مارينا
:)
اوروفوار
ههههههههههههههه
عجبتى اوى اوى حكايه المرايه اللى هاتكسريها زى الافلام كده و حكايه القلم الروج
بكره تتجوزى و لما تكتبى بحبك على المرايه هايقولك فيه وساخه على المرايه روحى نظفيها ساعتها هاتجيبى الفازه و تكسرى المرايه و تكونى بكده حققتى اتنين من احلامك بخبطه واحده
هههههههههههههههه
لاء كنت بهزر طبعا
ربنا يسعدك و تحققى احلامك
انتي فينك غايبة بقالك فترة
طمنينا عليكي يا قمر
ومين مش عايز!!!
غريبة...
احلامك بسيطة جدااا...
واجمل ما فيها هو انها كذالك
احلامك حلوة اوى وبسيطة ان شاء الله تقدرى تحققيها
شكرا على المقالة
احلام بسيطه اوى ياقمر
بس من كتر بساطتها ممكن تتحقق ولا هتفضل احلام!!
يارب تتحقق وتحققى كل الى تحلمى بيه
تحياتى
الأنسان مخلوق طماع
احنا كمان هنحلم معاكي
إرسال تعليق