الاثنين، 29 سبتمبر 2008

الواد ماس ابن فرناس ربنا ياخدة



انا دخلت عند المدونين اصحابى واصدقائى عشان كلهم وحشونى ولقيت معظمهم كاتبين عن الحرايق والاخ ماس كهربائى اللى مش عايز يسيب البلد فى حالها فقلت يابت مش تكئبى الناس اكتر من كدة هما مش ناقصين واحاول افكر فى حلول انفع بيها البلد برضة اصل لازم يكون ليا لازمة امال اية .. وربنا قدرنى وفكرت ووصلت لحلول امنة وجميلة حتمنع كل المشاكل اللى فى البلد اسمعوا معايا بقى وطرطقوا ودانكو .....

االحل الاول للمصيبة الاولى : اننا نقطع الكهربا عن مصر كلها اهو كدة ولا يبقى فيه ماس ولا بتاع وكلة حيعيش من غير حريقة وكنت حقولكوا استعملوا لمبة الجاز بس رجعت فى كلامى لان الجاز بقى غالى وكمان احتمال اللمبة تولع هيا كمان ويقولوا السبب ماس جازى فااحلى حاجة الناس تعيش فى ظلام دامس دة حتى حيبقى منتهى الرومانسية ومافيش حد حيشوف حاجة اصلا .

الحل التانى للمصيبة التانية : نقطع المية عشان هيا اللى بوشت الجبل بتاع الدويقة ونسعمل مية معدنية اهى ملوثة برضة وهما مش حيحسوا بفرق كبير يعنى .

الحل التالت للمصيبة التالتة : نمنع السياحة عشان مافيش حد يتخطف ونقفل علينا بلدنا بقى بلا بهدلة وقلة قيمة مش عايزين حد يجيلنا ولا نروح لحد ويابخت من زار وخفف ما هما مش معقول حيزرونا ويتخطفوا كمان والنبى مش عيب .

الحل الرابع للمصيبة الرابعة : نمنع السفر والهجرة مالهاش لازمة البهدلة والعبارات والمراكب كل واحد يتلم فى بيتة احسن منعاً للغرق ورفقاً للحكومة اللى لسة حتعمل عبارات وبعدين تغرق تانى هيا فلوس على الفاضى يعنى .

وكفاية كدة بقى عشان حاسة انى بقيت افكر ليكوا فى كل حاجة شغلوا دماغكوا شوية وبمناسبة تشغيل الدماغ حقولكوا فزورتين بمناسبة شهر رمضان كل سنة وانتوا طيبين واللى حيجاوب حيفوز برنة موبيل يامصر يامحروقة قصدى يامصر يامحروسة معلش غلطة مطبعية

اختار الاجابة الصحيحة:-

السؤال الاول : اية هو سبب الحرايق اللى كل شوية بتحصل فى بلدنا المحروسة ؟
( ماس كهربائى - ماس كهربائى - ماس كهربائى )

السؤال التانى : اية سبب كثرة حوادث القتل والجرائم العنيفة ؟
( مختل عقلياً - مختل عقلياً -مختل عقليا )

اختار الاجابة الصحيحة تكسب معانا وحتوصلك الرنة فى الحريقة اللى جاية
واحب اقولكوا ان مصر قصدى توتى فقدت الثقة فى كل اللى حواليها

هناك 16 تعليقًا:

elhadidi يقول...

انتي قولتي كل المصايب وسيبتي المصيبه الكبيره اللي قاعده على قالبنا من 25 سنه متحركتش دي بقى حلها اننا نسيبله البلد ونمشي

محمد حمدي يقول...

انا شايف الحل اننا ناجر البلد مفروش ونرتاااااااااااااااااااح

Desert cat يقول...

بصى احنا شعب فقرى فهو الحل انهم يغيرونا بشعب تانى
كل سنة وانتى طيبة

غير معرف يقول...

السلام عليكم

ايه التشاؤم ده
بلدنا بخير .. بصدق حرام نظرة الإحباط تلك
مش معنا ان فى بعض السلبيات أو الأمور المنغصة يبقى البلد وحشة .. كل اللى بتشفوه ده بيحصل فى كل حتة فى العالم ... انتم بتحلموا وعايزين البلد جنة من جنان ربنا وده مستحيل .. ياريت تكونوا واقعيين شوية ياجماعة وتخلوا طرحكم للخبر موضوعى وبدون غلو فى آثارة سواء السلبية أو الإيجابية

وياريت تطرحوا حلول واقعية من جانبكم وتنفذ من قبلكم فى مرة لمشكلة من المشكلات

عذراً إن أول مشاركة لى هنا فى مقامكم الرفيع هذا تكون بتلك الحدة

وكل سنة وانت طيبة

صباح الصباح يقول...

وبكدة نبقى رجعنا ايام مسلسل الوسية

واخبى رغيف العيش تحت السرير عشان مش ياخدوة منى

ههههههههههههههه

canary يقول...

بسم الله ما شاء الله
ايه الحلول العبقريه دى
كنتى غايبه فين من زمان . لما انت عندك كل الحلول الروعه دى
انت يمسكوكى البلد والله
وهيحصلنا ايه اسوء من اللى احنا فيه يعنى .. أهو نجربك برضه كام فترة رئاسيه كدة على ما تتعودى وتتودكى على أمور الحكم

momken يقول...

عجبانى اوى الحلول بتعتك

مع انى شايف ان الخطوة الى جايه انهم يبيعوا السد العالى علشان البلد تغرق بالميه ومتولع فيها حرايق تانى

وبكده يرتاحوا

تحياتى

son's egypt يقول...

السلام عليكم
الماس ده عامل مشاكل كتيرة اوي

Unknown يقول...

بجد مدونتك جميله

انا سعيد انى زرتها

ارجو التواصل

تحياتى

mostafa rayan يقول...

انتي فينك كل دة
طمنينا عليكي

yomna يقول...

ده انتي موضوعك جاه في وقته
انا من حوالي اسبوع اتحرق في العماره اللي قدامي مخزنين ومحل اتصالات وياعيني المخزنين كان فيهم بضاعه محل وراحت أغلبها
وولعوا الساعه 2 وربع بالليل
يعني كان الشارع مفيهوش حتي سريييييخ ابن يومين وكان الدنيا فاضيه
لا وايييييه بقي الستات عمالين يصوتوا في العمارات حواليها فين وفين لما بلغوا المطافي كان مخزن منهم بقي رمااااااده :(((

بس معرفناش بقي ساعتها كان سبب الحريقه شويه قالو ماس وشويه قالو بفعل فاعل الله اعلم بقي

بس حلوه الحلول بتاعت بجد ههههههه

تسلم ايدك

بنت مصريه يقول...

دا ايه الحلول الفله دى
ههههههههههههههههه
هو السؤال الخير دا اجبارى ولا اختيارى
ههههههههه
ايه يا بنتى دا
انتى فين من زمان مش بنشوفك يعنى

dina يقول...

هههههههههههههههههههههههههه
يا وجع قلبى على رأى مى كساب...غريبة اوى ان الشعب اللى قال المثل بتاع اللى اتلسع من الشوربة ينفخ فى الزبادى يكون مقضى كل حياته لسع من الشوربة و حتى مش بيفكر الغلط فييييييييييين؟؟؟؟؟؟؟؟
و عجبى

www.tadwina.com يقول...

مرحباً ،
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/64

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،

فريق عمل تدوينة دوت كوم.
http://www.tadwina.com

Tadwina يقول...

عزيزتي / "Facemoon"

لقد اثارت مدونتك "غير كل البنات" اعجاب كل العاملين في تدوينة دوت كوم خصوصا تدوينة "افتقدني" بما فيها من خواطر تميزت بالرقة والدفء وبعد اضافة مدونتك إلى تدوينة دوت كوم ورأينا مدى اقبال القراء على قراءة مدونتك لذا نرجو التكرم بوضع البانر الخاص بتدوينة دوت كوم على الصفحة الرئيسية لمدونتكم الغراء مما يسمح لكثيرين من مختلف العالم العربي بالاطلاع على تدوينتك المستحدثة ويسمح لكثيرين ايضا بالاطلاع وتصفح موقعنا " تدوينة بيت المدونات العربية"

يمكنك متابعة مدونتك على الرابط التالى:
http://www.tadwina.com/feed/64

و لكم جزيل الشكر،

فريق عمل تدوينة دوت كوم.
http://www.tadwina.com

Unknown يقول...

thx

كشف تسربات المياة
غسيل خزانات
شركة نظافة عامة