غير كل البنات

أفتقدنى

2009-06-30T23:56:00.008+03:00

أفتقدنى

أفتقد هدوئى وبراءتى وحريتى

أشعر انى مكبلة بأغلال سميكة ولا استطيع التحرك او حتى التنفس

أشعر بالضياع والخوف الشديد من المستقبل فالماضى كان به ما يكفينى من خوف

ما هذا الشعور اذى يعترينى ؟

لم أكن مستسلمة ابداً فى حياتى .. لماذا أشعر بالضعف والاستسلام الان ؟

أشعر انى خرجت خارج جسدى انظر الى نفسى

من انا ؟ لست انا هذه الفتاة ؟ من تكون هى ؟

لا ادرى ..

أريد ان اسألها ولا يخرج صوتى من حنجرتى ابداً

أريد ان اصرخ وأصيح وأدافع وأهاجم واتكلم فلست انا هذه الفتاة فهى سرقت جسدى

فهى فتاة غريبة عنى فهى نفس شكلى ومظهرى ولكنها ليست انا

افتقدنى .. افتقد شعورى بنفسى وبشخصى وبروحى

اريد ان اسألها وسأظل أسألها دائما ً ماذا تريدى منى ؟ ومن انتى ؟

ما هذا الذى يحصل لى

اشعر بشعور غريب الان ...... فأنا أقترب من جسدى بخطوات بطيئة أخيراً سوف اقترب واسألها من تكونى

اسمع اصوات كثيرة تنادينى ولكنى لا ادرك ولا استطيع اخراج صوتى ما هذا الالم الذى اشعر بة فجأة ؟

تذكرت .... فهذا بالفعل اسمى وهذا بالفعل جسدى تذكرت كل شىء الان

واستيقظت من غيبوبتى وأكتشفت ان هذا من آثار المخدر الذى بدأ يزول بعد إجرائى لجراحاتى المتعددة

ولكن الغريب عندما استيقظت لم اعرف من انا ؟ ولم اعرف ماذا اريد ؟

وادعو الله ان لا يستمر معى هذا الاحساس بالتخدير طوال الحياة وان اعرف من انا وماذا أريد ان اكون ؟

الواد ماس ابن فرناس ربنا ياخدة

2008-09-29T01:31:00.007+02:00

انا دخلت عند المدونين اصحابى واصدقائى عشان كلهم وحشونى ولقيت معظمهم كاتبين عن الحرايق والاخ ماس كهربائى اللى مش عايز يسيب البلد فى حالها فقلت يابت مش تكئبى الناس اكتر من كدة هما مش ناقصين واحاول افكر فى حلول انفع بيها البلد برضة اصل لازم يكون ليا لازمة امال اية .. وربنا قدرنى وفكرت ووصلت لحلول امنة وجميلة حتمنع كل المشاكل اللى فى البلد اسمعوا معايا بقى وطرطقوا ودانكو .....

االحل الاول للمصيبة الاولى : اننا نقطع الكهربا عن مصر كلها اهو كدة ولا يبقى فيه ماس ولا بتاع وكلة حيعيش من غير حريقة وكنت حقولكوا استعملوا لمبة الجاز بس رجعت فى كلامى لان الجاز بقى غالى وكمان احتمال اللمبة تولع هيا كمان ويقولوا السبب ماس جازى فااحلى حاجة الناس تعيش فى ظلام دامس دة حتى حيبقى منتهى الرومانسية ومافيش حد حيشوف حاجة اصلا .

الحل التانى للمصيبة التانية : نقطع المية عشان هيا اللى بوشت الجبل بتاع الدويقة ونسعمل مية معدنية اهى ملوثة برضة وهما مش حيحسوا بفرق كبير يعنى .

الحل التالت للمصيبة التالتة : نمنع السياحة عشان مافيش حد يتخطف ونقفل علينا بلدنا بقى بلا بهدلة وقلة قيمة مش عايزين حد يجيلنا ولا نروح لحد ويابخت من زار وخفف ما هما مش معقول حيزرونا ويتخطفوا كمان والنبى مش عيب .

الحل الرابع للمصيبة الرابعة : نمنع السفر والهجرة مالهاش لازمة البهدلة والعبارات والمراكب كل واحد يتلم فى بيتة احسن منعاً للغرق ورفقاً للحكومة اللى لسة حتعمل عبارات وبعدين تغرق تانى هيا فلوس على الفاضى يعنى .

وكفاية كدة بقى عشان حاسة انى بقيت افكر ليكوا فى كل حاجة شغلوا دماغكوا شوية وبمناسبة تشغيل الدماغ حقولكوا فزورتين بمناسبة شهر رمضان كل سنة وانتوا طيبين واللى حيجاوب حيفوز برنة موبيل يامصر يامحروقة قصدى يامصر يامحروسة معلش غلطة مطبعية

اختار الاجابة الصحيحة:-

السؤال الاول : اية هو سبب الحرايق اللى كل شوية بتحصل فى بلدنا المحروسة ؟

( ماس كهربائى - ماس كهربائى - ماس كهربائى )

السؤال التانى : اية سبب كثرة حوادث القتل والجرائم العنيفة ؟

( مختل عقلياً - مختل عقلياً -مختل عقليا )

اختار الاجابة الصحيحة تكسب معانا وحتوصلك الرنة فى الحريقة اللى جاية

واحب اقولكوا ان مصر قصدى توتى فقدت الثقة فى كل اللى حواليها

2008-08-03T01:52:00.008+03:00

بعد فترة غياب رجعت لقيت الدنيا مكركبة فى المدونة وكمان عندى تاج مش اتجاوب حجاوب عليه من كل قلبى لانه من حبيبتى دينا صاحبة مدونة ضحك ولعب وجد وحب وانا بشكرها كتير انها دايما فكرانى يلا نبدأ :

أذكر 16 صفة عن نفسك ؟

1- طيبة وهادية وطموحة جدا

2- صعب حد يقنعنى بحاجة مش عايزاها او فيها حاجة قلقانى

3- فى اوقات بكون كسلانة جدا وفي اوقات تانية تلاقينى بقيت نشيطة وممكن اجرى كمان

4 - مش عندى صبر

5- مش بعرف اكسف اللى قدامى او احرجة بالذوق ودة بيخلينى اقع فى مشاكل فى حياتى كتير

6-حساسة جدا واقل حاجة تزعلنى بميل للأكتئاب كمان بسرعة

7- بميل للانعزال والتفكير لوحدى

8- مش باخد اراء الناس اللى حواليا فى حياتى يعنى اوقات كتير بنفذ اللى فى دماغى وخلاص

9- تلقائية وطبيعية اللى فى قلبى على لسانى

10- بحب اصحابى جدا وممكن اعمل اى حاجة عشانهم مع انهم مبقوش كتير دلوقتى

11- مش بعرف احتفظ بناس بحبهم فى حياتى ودة خلانى اعتقد ان العيب منى

12- رومانسية جدا جدا جدا

13- كتومة كتير ومش اى حاجة بحسها بقولها وبحل مشاكلى بنفسى

14- ناس كتير بتقول انى جدعه اوى

15- بحب القراءة والشعر والاغانى الرومانسية والنت والكمبيوتر والبحر والسما والمناظر الطبيعية اللى بنسى نفسى فيها

16- احيانا بفقد ثقتى فى نفسى

أذكر أحلام تخص ماضيك كنت حتتخلى عن اية وحتتمسك بأية لحد دلوقتى ؟

كان نفسى ابقى فنانة رسامة تشكيلية وادخل فنون جميلة مثلا بس الحلم دة اتفركش وحلمت انى اكمل الماجستير بتاعى بس الحلم دة برضة اتفركش وكان نفسى احفظ القرآن واتعلم انجليش وادخل مدارس لغات زى العيال بتوع اليومين دول وكنت حتمسك بكل دول مش حتخلى عن ولا فتفوتة فيهم بس انا مقتنعة ان ربنا بيكتب نصيب كل حد فينا ومش زعلانة على اللى فاتنى او اللى مش حققته لان لسة طول ما انا عايشة حلاقى احلام كتير احققها

أذكر أحلام تخص مستقبلك وما تتمناة ؟

بتمنى انجح فى شغلى وابقى حاجة الى حد ما ناجحة بتمنى كمان اكون أسرة واربى عيالى تربية دينية صالحة واعلمهم حاجات انا متعلمتهاش فى حياتى وقبل كل دة اقابل ابوهم طبعا ربنا يخلية لينا بقى

اذكر شخصين على الاقل موجودين فى حياتك و كنت تتمنى وجودهم من قبل كدا؟

اى صديق وانسان وقف جنبى وبيحبنى كنت بتمنى اعرفة من زمان

اذكر شخصين غير متواجدين فى حياتك و تتمنى وجودهم مستقبلا فى حياتك و حياة ولادك؟

باباهم طبعا دة اولا وكان نفسى جدتى وجدى يكونوا موجودين برضة لان انا مش عرفتهم كويس وكنت حاسة انهم كانوا حيأثروا فى حياتى وحياة اولادى لان حيشوفوا فيهم الاصالة بتاعة زمان .

والحمدلله خلصت

بهدى التاج بقى :

1- لايمى مدونة بحب السيما

2- مصطفى مدونة ابداعات شاب ثائر

3 - وائل مافيش احسن من ان يكون ليك اصحاب بجد

احساس غريب

2008-07-12T02:15:00.005+03:00

اصعب حاجة فى الدنيا لما تحس بوحدة بالرغم ان ناس كتير حواليك

وناس كتير بتقول انها بتحبك
بس برضة انت حاسس بوحدة
حاجة وحشة جدا لما تحس فى عيونهم بأهتمامهم بيك بس برضة حاسس ان فيه حاجة ناقصاك
لما تقعد لوحدك باليل تفكر وعنيك فى السما الواسعة وتقول انا لية حاسس بوحدة بالرغم ان بيتى مليان ناس وحياتى مليانة اصحاب
فكرت فى السؤال دة كتير وملقتش اجابة
لية لما دموعى تنزل مش بلاقى حد يقف جنبى يمسحها ويقولى احكى قولى
صحيح بلاقى اللى بيقولى كدة بس برضة مش بحكى ولا بقول حاجات كتير مكتومة جوايا مش بقدر اعملها وبلاقى نفسى فى الاخر لوحدى
يمكن الاحساس بالوحدة دة اصعب احساس وخصوصا لو كان حواليك ناس كتير لانك ساعتها مش بتبقى وحيد فى نظرهم بتبقى عايش وسطيهم بس مش حاسس بيهم ولا هما حاسين بيك
عارف لما تبقى ماشى فى الشارع وتكلم الناس وهما مش شايفينك
عارف لما تحب من طرف واحد وحبيبك حتى مش واخد بالة منك
عارف لما تخبطك عربية وتمشى ومحدش يهتم حتى ياخد بأيدك ويشيلك من وسط الطريق
لما تقف وسط الشارع وتصرخ وتقول ياخلق هو وووو انا اهو انا موجود وبرضة مكملين طريقهم ومش شايفنك
كأن الناس مبقتش شايفة بالرغم انهم موجودين معرفش العيب فى مين فى الناس اللى كل واحد مكمل طريقة لوحدة ومش شايف غيرة جنبة ولا بيشاركة افراحة واحزانة وبقى كل واحد مهموم فى الحياة ومشاكلها ودوامتها ولا هيا دى فعلا الحياة ولازم نعيشها كدة

دى وصفة سهلة

2008-06-14T02:16:00.006+03:00

طلبت ممن حولى ان يضعوا لى وصفة سحرية للحب

قالوا لى.... تجملى لمن حولك

طلبوا منى... ان اتجمل فى كلامى

وفى سيرى

وفى تفكيرى

والبعض قال اتجمل فى شكلى

واترك شعرى منسدل

وان اضع الالوان على وجهى

وان ارش العطر على ملابسى

وان اكون مصطنعة حتى اجذب الحب الى

والبعض قال ان اكذب

فالكذب هو الوصول الى قلب الرجل لتمتلكية

لم اصدق ان كل هذا هو الوصفة السحرية للحب

بل هى وصفة مخادعة لا تليق بى

فاليك عزيزى القارىء وصفتى السحرية الخاصة

اضع قليل من الحنان فى كلامى واشترية من قلبى فهو منبع حنانى الدائم

واضع بعض من الابتسامة على وجهى ليحس حبيبى بالراحة كلما نظر الى

واضع قليل من التواضع حتى يكسبنى حب الاخرون دائما

مع قليل من الصبر والتضحية والتفاهم والاحترام والاخلاص

مع التجديد والتقليب المستمر

مع وضع الكثير الاهتمام الشديد بمن احبة

ولكن اخاف ان اضع الكثير من الانانية والخوف الزائد فى ان اخذه لى وحدى وان اغار عليه من الدنيا وما فيها

ولكن هل سوف تعجب هذه الوصفة من حولى

لا اعلم ..... فاطلب منك عزيزى القارى ان تقدم هذه الوصفة الى من تحب وتقول لى النتائج

بالهنا والشفا

لست سوى طفلة

2008-05-26T20:12:00.010+03:00

طفلة انا احب ان العب فى كل مكان

واحب ان اعبث بالالوان

واداعب الشمس والقمر فهم عندى سيان

واقرأ كتاب به حكايات وحواديت اطفال زمان

وارسم واصنع اشكال بالرمال

وان اشاهد السماء واشكال السحاب

واتفرج على توم وجيرى وسندريلا وطرزان

واتبسط وابقى سعيدة لو شوفت فوازير نيلى وشريهان

واسلم واخد اصحابى بالاحضان

واخدهم ونروح ناكل روز بالبن وبونبون كمان

ونلعب كتير لحد ما يشتكوا مننا الجيران

واغمض عينى وافتحها الاقينى كبرت فجأة وبدون انزار

وابص حواليا الاقى الدنيا اتغيرت حتى الاطفال بقوا حاجة جنان

و اصحى على صوت ضوضاء وزعيق فى كل مكان

اصحى تعبانة وكسلانة واكون عايزة انام اكتر كمان

البس هدومى فى كسل وزهق والاقى الوقت بيجرى زى الرهوان

انزل بسرعة واشوف حاجة توصلنى لحد المكان

اوصل شغلى وافتح ورقى واجيب قلمى واطلب شاى من عم سلطان

وابص حواليا الاقى الناس بتجرى فى كل مكان وبتزعق على الفاضى والمليان

بيجروا ورا المصالح وعايزين يعيشوا فى ذل وهوان
زهقت خلاص طهقت ومش قادرة اسمع اى كلام

اسد ودانى ولا اقول كفاية ياجدعان

واقول امتى اللى كان يرجع يازمان

عشان اقولة .... لست سوى طفلة تريد ان تلعب بالالوان

فاصل ثم نواصل

2008-05-18T21:54:00.012+03:00

بعد رجوعى بعد شوية غيبة لقيت تقريبا معظم المدونات فى اجازة من التدوين بسبب الامتحانات حبيت اشاركهم مشاركة وجدانية واستناهم لحد ما يرجعوا بالسلامة اصدقائى برضة ولازم اقف جنبهم يارب كل اللى بيمتحنوا ربنا يوفقهم ويخلصوا بسرعة ومش يغيبوا علينا

المشاركة الوجدانية اللى فاتت كانت للطلاب اللى ربنا بلاهم بالامتحانات

اما المشاركة الوجدانية اللى جاية فهى للشعب كلة اللى ربنا بلاة بحاجات كتير

مشتقالك

2008-05-12T23:15:00.013+03:00

مش عارفة انساة

مع انه جرحنى اوى بس مش عارفة انساة

بفتكر كل كلمة قالهالى و كل وعد وعدنى بية

بفتكر ضحكتة طريقة كلامة

بيحب اية بيكرة اية

امتى كان بيزعل وامتى كان بيفرح

بفتكر اسماء ولادنا اللى كنا حنجبهم

بفتكر تفكيرة فى سعادتى بفتكر غيرتة عليا من اقل حاجة

بفتكرة كل ما اسمع أغنية حلوة

بفتكرة كل ما اشوف وردة ندية فى صباح جميل

بفتكرة كل ما امشى على البحر واشوف وقت غروب الشمس

بفتكرة كل ما اشوف اتنين بيحبوا بعض

بفتكر زعلة منى وازاى كنت بصالحة

بفتكر حتى مشاكلنا مع بعض

حتى بفتكر وقت الفراق

بفتكر كل حاجة حتى لو كانت صغيرة

وغصب عنى دموعى بتنزل منى

غصب عنى

غصب عنى بحزن وبحس انى ضيعت حب كبير فى حياتى

يمكن انا السبب يمكن هو السبب يمكن الظروف هيا السبب

المهم انى حاسة انى تايهه ضايعة من غيرة مش عارفة طريقى فين

مش قادرة احس بالحب تانى

مش عارفة احس بكلمة بحبك تانى بقت ملهاش معنى

اشتقتلك اوى

تحديث او ملحوظة اللى يعجبكوا بقى :

انا متشكرة على كل التعليقات وعلى كل الناس اللى علقت وخافت عليا ونصحتنى نصايح غالية اوى وبجد انا استفدت منها واكيد كل واحدة بتحب وضحت وحزنت على الحب دة استفادت من النصايح برضة زييى بشكركوا جدا جدا جدا

بس الكلام دة كان عن تجربة قديمة اوى يعنى تقدروا تقولى انى كتبت خواطر عن احاسيس حصلت ليا ولناس غيرى كتير

وكل تجربة ليها افادة وكل واحد بيتعلم من تجاربة والحمدلله انا اتعلمت كتير

وانا حاليا حرة مستقلة ههههههه

غير كل الأحلام

2008-05-02T21:48:00.006+03:00

مش عايزة فلوس فى البنك

مش عايزة فيلا فى مارينا

مش عايزة عربية اخر موديل

مش عايزة حاجة من الدنيا

غييييييييييير

كتاب ربنا ورضاة عنى عشان احس انى عايشة بفايدة

غير حبيب يحن عليا ومكان يجمعنى بية ورغيف عيش اقسمة انا وهو والحبيب والعيش فى الزمن دة صعب ان الواحد يلاقيهم

غير مرايا تقولى انى جميلة واحس انها بتكدب عليها واكسرها عشان احس براحة زى المسلسلات كدة

غير مج نسكافية عشان اصحصح اول ما اقوم من النوم

غير الوان شمع الون بيها حياتى وقت ما انا عايزة

غير اوضة صغيرة يكون فيها اربع جدران وشباك صغير ووردتين وشريط لفيروز عشان لما احب اهرب من كل الناس ولما احب اكلمهم افتح الشباك واسلم على الدنيا ببسمة وفرحة على وشى

غير صباع روج عشان اكتب كلمة بحبك على المرايا وقت ما تتكتم الكلمة جوايا ومقدرش اقولها

غير ورقة وقلم عشان اطلع احاسيسى فيهم واشخبط شخابيط وارسم بلالين وايس كريم وشجرة تحتها ولد وبنت بيحبوا بعض

غير ديوان لفاروق جويدة عشان احس ان فيه حد عارف معنى الحب وعارف فعلا يحسسنى بية

غير سما صافية ورملة صفرا وهوا نقى وبحر ازرق ودنيا واسعة

غيرطفلة صغيرة تحبنى واحبها وتبقى كل دنيتى

غير نجوم بتلألأ فى السما وقمر مدور بيفكرنى باللى بحبه

ومافيش مانع لو برضة لقيت فلوس وعربية وفيلا هههههههه زيادة الخير خيرين برضة

كنت بقول انى مش عايزة حاجة من الدنيا بس فى الاخر اكتشفت انى عايزة كل الدنيا

الاحلام عمرها ما بتنتهى حتى لو حققناها بتحلموا زييى ولا شكلى بحلم لوحدى فى الدنيا دى

ااااةةةةةةةةة ياحلمى البعيد مليت من الأنتظار

النسيم طلع ريحتة وحشة اوى

2008-04-29T17:49:00.010+03:00

قررنا نحن الاسرة الكريمة المكونة من خمس افراد ان نتجمع نحن وكل العيلة كلها كلها وما ادراك ما العيلة بقى

لية ياولاد هو فيه اية

قالولى شم النسيم ..... طيب واية يعنى ما احنا كل يوم بنشم هوا وكلة ملوث

بس قالولى لا اليوم دة مختلف عن باقى الايام

فكرت طيب ياترى مختلف فى اية دة حتى بيبقى يوم ملوث اكتر من بقية الايام الناس كلها بتخرج من بيتها وبتبقى الدنيا زحمة والناس كلها بتتكلم والصوت بيبقى عالى وبيبقى فيه تلوث سمعى ويمكن بصرى لاننا بنشوف ناس غريبة برضة بتعمل حاجات غريبة

واكتر تلوث بقى هو التلوث الشمى طبعا انتوا مش عارفينة يمكن عشان قاعدين فى البيت مش شميتوا النسيم اللى بيقولوا عليه

طيب جربوا واخرجوا كدة شوفوا النسيم ريحتة عاملة ازاى

فسييييييييييييييييييييييييييييييخ

يع
فسييييييييييييييييييييييييييييييييخ

شفتوا ريحة الفسيخ قصدى النسيم حلوة ازاى ... ازاى بس تسيبوا يوم زى دة مليان تلوث ومش تخرجوا فيه غلطانين والله

المهم خرجنا واتجمعنا كلنا فى بيت قلت بقى حناكل اكلة حلوة احنا معزومين بقى اما نشوف حيأكلونا اية فى العيد اللى بيقولوا عليه دة

قالولنا اتفضلوا.... ويارتنا ما اتفضلنا.... فسيخ فسيخ فسيخ هو ورايا ورايا مش كفاية ريحة البلد كلها فسيخ حراااااااااااااااااااااام

انا جالى صرع وعلى قولة واحدة ماكلوش يابابا ماكلوش يابابا

بابا قالى طيب بلاش فسيخ كلى رنجة

وعلى قولة واحدة ماكلوش يابابا ماكلوش يابابا

مع ان الرنجة حلوة بس انا جالى صرع وقرف فى اليوم دة اية الحلو فى الحاجات دى

دى حتى ريحتها وحشة وكمان مش كويسة للصحة بجد احنا بلدنا غريبة اوى وتقاليدنا اغرب جابوا العيد دة منين

سألت وتفحصت كالعادة لقيت ان العيد دة من ايام الفراعنة وكل التقاليد دى منهم طيب اشمعنى دة اللى اخدناة من الفراعنة مش اخدنا لية تطورهم وتفكيرهم اللى كان سابق عصرة محاولناش لية نعمل المستحيل زيهم ونخلى الناس كلها تنبهر بينا وبثقافتنا

ليه دايما بنعيش على امجاد الماضى ويارتنا بناخد الحاجات الحلوة بناخد الحاجات اللى ريحتها وحشة بس

المهم انى اكلت جبنة بيضا فى الاخر وفوووووووووووووووووول هو دة المضمون فى الزمن دة وبعدين مصرى اصيل مش من الفراعنة ولا حاجة اصلى مش بحب اقلد حد

انا بس حبيت اطمن عليكوا بعد اكل الفسيخ ...... واقولكم كل سنة وانتم طيبييييييييييييييييييين

أحبنى كما انا

2008-04-24T16:48:00.011+02:00

الحب

ذلك الوهم القاتل

ذلك الاسم البديع

وتلك الحروف الرائعة

كم تعذبت لفهم هذه الكلمة ولم افهم معناها حتى الان

هل الحب هو الاحتياج لشخص معين ؟

ام هو الاحساس بالأمان ؟

ام هو أحساس غامض يغوص بداخل العقل والقلب معا... ام هو كل ذلك؟

كثيراً اشعر بالحب بهذا الشعور الذى يدغدغ احاسيسى ويجعلنى اتصرف بلا تفكير

انا اكرة نفسى حين احب

اصبح انسانة اخرى غير التى اعرفها

فتلك الكلمة تجعل بداخلى اشياء كثيرة تحتاج الى ترتيب

تجعل عقلى لا يستوعب الاحداث التى تجرى حولة

فانا اريد ان احتفظ بنفسى كما انا واريد منة ان يحتفظ بى كما انا لا يحاول تغيرى

بل يحاول تجميع افكارى المبعثرة ليجعلها لى وله معا

وليتجرد من انانيتة فى الاحتفاظ بى له فقط

يتجرد من انانيتة فى محو ذاكرتى ليصبح هو فقط بداخلها

ان يحبنى كما انا

وان احبة ايضا كما هو

فانا اريد الحب

واريدة ايضا

فهل مطلبى صعب ام الحب سوف يغيرنى الى الابد ؟؟

تااااااااااااج وياقوت ومرجان احمدك يارب

2008-04-16T12:42:00.017+02:00

بما انى وجه جديد على عالم التدوين فكنت بحسب انى محتاجة وقت كتير عشان اتعرف واختلط بالناس العباقرة اللى بتكتب بس الحمدلله بقى ليا اصحاب كتير وناس بحب ازورهم ويزورونى وكنت بجد مبسوطة وفرحانة لما افتكرتنى دينا صاحبة مدونة ضحك ولعب وجد وحب واهدتنى التاج دة كان بالنسبة ليا زى جايزة الاوسكار مثلا وبما ان اختكم عالطول محتاسة ومش فاهمة حاجة فكنت محتاجة افهم يعنى اية تاج من اساسة بس الحمدلله عرفت وعقبال ما يجينى تيجان كتير لحد ما يبقى صولجان ان شاء الله ويبقى عندى قصر بقى واتجوز ملك ملوك البحار بس بس انتوا سبتونى احلم لية خلينا فى اللى احنا فيه حقولكوا قواعد اول تاج حجاوب عليه :

أولا:اذكر عشرة اشياء عن نفسك ..... عشرة كتير اوى انا مبعرفش اكتب عن نفسى كتير تواضع بعيد عنكوا

ثانيا:اختر خمس اشخاص تهدى لهم التاج ..... يووووووة خمسة بس انا نفسى اخلى الناس كلها تجاوب

ثالثا:لا تهدى التاج لمن اهداه اليك ..... ليكى يوم يادينا وحديكى تاج واحدة بواحدة

رابعا:عرف اللى بعتلك التاج انك نزلته عندك..... اكيد اكيد حعرف الناس كلها هو انا حتعب كل دة ومش حخلى حد يشوف ادعولى بقى

يلا حجاوب استعدوا للقنابل اللى حتتقال خدوا ساتر بسرعة :-

الأول : انا بنت عادية وبسيطة خالص بحاول اعيش حياتى على حسب اقتناعاتى بالرغم من التناقضات الكتير الموجودة فى الحياة حواليا دلوقتى واللى ساعات بتخنقنى وبتخلينى مش عارفة اخرج برة الجدار اللى انا عايشة فيه

الثانى : بحاول ابقى غير كل البنات مش عايزة ابقى زى بنات اليومين دول اللى كل همهم انهم يهتموا بنفسهم وبس انا نفسى اهتم بنفسى وبعقلى كمان بحاول اطور من دماغى وعقلى عشان بالنسبة ليا الست مش مجرد جسد جميل هيا عقل وفكر وشخصية

الثالث : انا بنوتة اسكندرانية جدا اوى خالص بموت فى اسكندرية وبحب البحر بشتكى لشوارع مدينتى لما اكون زعلانة وبفرحها لما اكون فرحانة ليا ذكريات فى اماكن كتير وبحب البحر ومش متصورة حياتى من غير بحر ومن غير اسكندرية كانت حتكون ازاى

الرابع : الناس اللى بتعرفنى بتقول عليا بنوتة جدعة جدا صاحبة صاحبتها بحب ابقى صندوق اسرار وبحب ادخل فى حياة اللى اعرفة واحلله كل مشاكلة بس محبش حد يدخل حياتى ولا يحللى مشاكلى ومحدش يسألنى لية يمكن عشان منغلقة على نفسى ومتعلمتش اخلى حد يشيل عنى همومى ويمكن دة اوقات كتير بيخلينى حزينة لان كتم الشكوى والحزن مضر جدا بالصحة زى السجاير بالظبط

الخامس : عندى مشكلة فى النوم تقريبا حياتى ملخبطة ساعات انام الصبح وساعات انام باليل واوقات كتير مش بنام خالص ويمكن دة سر عبقريتى اللى انتم طبعا حاسين بيها هههههههه وساعات الوحدة والليل والسما والنجوم هيا اللى بتخلينى افكر واطلع حاجات كتير من دماغى مش بتتطلع الصبح خالص برضة مقدرش اقولكوا السر بس تقدروا تقولوا انى انسانة ليلية جداااااااااااا

يامسسسسسسسسسسسسسسسسهل تعبت بقى فاضل خمسة اوعوا تزهقوا

السادس : بحب الطرب الأصيل بحب ام كلثوم وحاجات لعبد الوهاب ونجاة ووردة وبرضة بحب اغانى دلوقتى عمرو وتامر وحسام حبيبت ومحمد عدوية وناس كتير بقى يعنى تقدروا تقولى عندى تناقض فى الاذواق بسمع من اول بتهوفن وعمرو خيرت لحد شعبان عبد الرحيم وسعد الصغير بس المهم حالتى المزاجية والاغنية الحلوة اللى تتدخل مزاجى غالباً بتكون رومانسية وبتخلينى اعيط وبحب الاشعار كمان بحب الابنودى وعمنا نجم وجويدة وكمان نزار قبانى واى شعر كلماتة تتدخل فى دماغى وتخلينى اسرح فى دنيا تانية

السابع : بحب اهلى جدا ومقدرش اتخيل حياتى من غير حد فيهم بحب اخواتى وماما وبابا بس يمكن عندى مشكلة فى التعبير عن حبى ليهم لان ساعات خجلى يمنعنى انى اقولهم انى بحبهم خالص بس يمكن تصرفاتى بتدل على انى بحبهم بس ساعات هما مش يفهمونى ولا يفهموا انا عايزة اية فساعات كتير بستسلم لتفكيرهم بس لمجرد انى مش عايزة ازعلهم ودة ضعف منى بس برضة ربنا يخليلى اهلى ويبقوا راضين عنى دايما

الثامن: بحب القراءة والثقافة بجميع انواعها عندى كتب كتير وبصرف فلوس كتير على الكتب ناس كتير بتنتقدنى عشان كدة بس انا بحب دايما اعرف افكار الناس اللى حواليا عاملة ازاى وبحب الانترنت برضة لنفس السبب بيخلينى اعرف الدنيا عاملة ازاى لان انا حياتى يمكن منغلقة شوية والكتب والانترنت هما شعاع الحياة بالنسبة ليا

التاسع : اتصدمت فى ناس كتير واتخدعت من ناس اكتر يمكن عشان انا طيبة وعندى حسن نية فى اى حد بقابلة بس من كتر الصدمات تقريبا فقدت الثقة فى اى حد اقابلة وخصوصا فى الارتباط بخاف افشل فيه بس عندى امل اقابل انسان يغير ليا نظرتى للحياة بس بالرغم من كل دة انا بحب الضحك وناس كتير بتقول ان دمى خفيف يمكن عشان مش بحب ازعل الناس معايا وبخلى الزعل جوايا انا بس

العاشر : نفسى ارضى ربنا ودة اهم حاجة فى كل اللى فات بس مهما عملت عشان ارضى ربنا بحس دايما ان فيه حاجة ناقصانى مش عارفة لية بحس ان فيه حاجة لسة معملتهاش عارفة انى ساعات بقصر فى حقة وعارفة انى بغلط فى حاجات وعارفة انه بيسامحنى دايما انا بحس انه بيسامحنى وعارفة انه شايلى الخير دايما وعارفة ان ليا عيوب كتير فى شخصيتى عارفة انى ساعات بعاند وساعات ببقى طيبة زيادة عن اللزوم وساعات ببقى عصبية شوية وساعات احب الوحدة والانعزال وساعات مبعرفش ابقى اجتماعية بس بحاول اصلح من نفسى وعارفة ان ربنا بيساعدنى والحمدلله

ياساتر دة مجهود رهيب صعب اوى حد يكتب عن نفسة بس اهو حصل بقى واللى كان كان

اهدى بقى التاج لخمسة :

1- عاشقة الجنة مدونة هموم تضحك وهموم تبكى

2- داليا مدونة بالفطرة

3- صبرنى يارب مدونة رغى امرأة غير مطحونة

4- الجواز وسنينة مدونة الجواز واتجوزنا

5- سمر مدونة الليل والقمر والورقة والقلم وانا وحدى افكر

كدب اية الى جاى تقول علية (و الله العظيم حقول الحق)

2008-04-09T22:31:00.009+02:00

و اللة الراجل الى اخترع كدبة ابريل دة راجل غريب جدا و اكيد يا كان مبرشم يا اما كان راجل كول على الاخر لأنة فى الحالتين لا يمكن يكون عايش او بيتعامل مع بنى أدمين فالعادى و الطبيعى ان الواحد يكدب مين فينا مبيكذبش اقل من كدبتين فى حياتة اليومية كذبة ييضا بقى كذبة سودة مش حتفرق كتير

بص بص اديك بتكدب و بتقول انا مابكدبش امال لية امبارح قلتى لماما معلش يا ماما هاتيلى كباية مية اصل صباع رجلى الصغير مفأفأ و انت امبارح لما كنت مع صحابك على القهوة و المزة كلمتك مش قلت معلش اصل بابا جتلة جلطة و اختى اتشلت و اجبرت انى اوديهم المستشفى و انت يا ولد يا للى هناك انت مش المدرسة سألتك معملتتش الو اجب لية قلتلها أصل ماما اتخنقت مع بابا و رمتة بشنطة المدرسة فالشنطة طارت من الشباك قاال يعنى الست الولدة معندهاش شبشب تضرب بية السيد الوالد علشان كل الاسباب الى انا قلتها مش مفروض نخصص شهر للكذب

احنا لازم نخصص يوم للصدق و متخفش مش حتتكشف لأن مفيش حد حيصدق انك بتقول الحق

فرحنى و اديلك قرش!!!!!

2008-04-09T21:36:00.009+02:00

زمان كانت فى حاجات كتير ممكن بسهولة تفرحنى كنت بفرح لما بابا يبوسنى و لما يجى يغطينى و انا نايمة و كنت بفرح لما ماما كانت بتعملى اكلة بحبها و كنت بفرح لما اضرب اختى الكبييرة و محدش يسأل كنت بفرح لية!!!!!!!!!
و كنت بفرح لما العيد يجي و العيلة كلها تتجمع وألعب مع ولاد عمى اى نعم كانوا غلسين ودايماً مكنوش بيرضوا يلعبونى معاهم بس كنت بفرح
دلوقتى مبقاش فى حاجة تفرحنى و الحاجات اللى كنت بفرح منها زمان بقت دلوقتى حاجة عادية جدا نفسى ارجع افرح زى زمان و اضحك من قلبى
و مرة واحد معيد من المعيدين بتوعى سأل اية الهدف الى انتوا عايشين عشانوا و احد من صحابى قال علشان اشتغل و انجح وواحدة من صحابى قالت اتجوز و واحد اخر قال ارضى اهلى اما انا بقى قلت انا مستنية حد اى حد يفرحنى زى ما كنت بفرح زمان

تابع : يلا عشان نضرب تانى مرة

2008-04-05T16:10:00.008+02:00

انا مكنتش عايزة اكتب المواضيع ورا بعض كدة بس برضة موضوعى دة لية علاقة بالموضوعين اللى قبل كدة عشان الظاهر كان الاضراب هو كدبة ابريل بجد الناس بتضحك على نفسها وبتصدق والحكومة بتضحك علينا برضة بس بجد فيه حاجة استفزتنى اوى فى جريدة الأهرام النهاردة السبت الموافق 5 أبريل2008 يعنى قبل اليوم المحدد للأضراب اللى قالوا عليه حنقل ليكوا الخبر زى ما هو وانت قولوا رأيكوا عشان بجد مبقاش فيه كلام يتقال :

الحبس عقوبة المحرضين والمشاركين في الإضراب :-
أكد المستشار خليل مصطفي بمحكمة الاستئناف أن عقوبة الحبس تواجه المحرضين علي الإضراب ومن يشاركون فيه بالامتناع عن أداء عملهم‏,‏ حيث تنص المادة‏124‏ من قانون العقوبات علي معاقبة كل من امتنع عمدا عن تأدية واجب من واجبات وظيفته بالحبس مدة لا تقل عن‏3‏ أشهر ولا تجاوز عاما‏,‏ ويضاعف الحد الأقصي للعقوبة إذا كان ترك العمل من شأنه أن يعرض حياة المواطنين أو أمنهم للخطر‏,‏ كما ينص القانون علي عقاب كل من اشترك بطريق التحريض علي الإضراب بضعف العقوبة السابقة‏.‏

ياحلاوة ياولاد زغرطوا حنتسجن اهو فداء للوطن برضة بس انا بفكر فى حاجة لو شعب مصر كلة عمل اضراب كلنا حناخد حبس كدة بربطة المعلم مرة واحدة طيب مين اللى حيجيب عيش وحلاوة .... حاجة غريبة والله بذمتكوا مش حاجة تفرس مش حاجة تغيظ يعنى الناس كلها عارفة ان الاضراب دة مش حل ولا حاجة ولا اصلا حيفيد ولا حيسمع الحكومة ولا الحكومة اصلا حتهتم بس اهو يحسس الناس انها بتعمل حاجة يااما حتنفجر كمان مش عايزينهم يشاركوا فى وطنهم الاضراب دة اصلا مش كان حيضر حد ولا حيأذى حد بالعكس دة المواطنين هما اللى كانوا حيأذوا نفسهم وفى الاخر كمان يبقى فيه عقوبة عقوبة عشان الناس بتتكلم بتعترض بتطلع الى جواها انا بجد مش عارفة اقول اية ..... وبس كدة كفاية خلينى ساكتة احسن

صباحو كدب

2008-04-03T22:16:00.009+02:00

من كتر ما الناس اللى ضحكت عليا بكدب كتير اليومين اللى فاتوا بسبب المقولة المزعومة اللى اسمها كدبة ابريل اللى جت فوق دماغى انا معرفش انا مالى ومال كدبة ابريل قعدت مع نفسى وقلت ياترى الحكاية دى فى كل العالم ولا فى مصرنا الحبيبة ام الاختراعات وبعد تفكير قررت اتمحص وادور عن اصل الحكاية وبدأت ودورت.. وتمحصت.. ووصلت .....وصلت لاية.. ولا حاجة خالص...

ما تصبروا عليا مستعجلين على اية مش كفاية انا اللى بدور بدالكوا... انا اكتشفت ان مش احنا بس اللى بنقول كذبة أبريل طلع العالم برضة كلة مش عارفة اية الهبل دة بس كل بلد من بلاد العالم ليها يوم مختلف مثلا المكسيك بتحتفل يوم 28 ديسمبر والهند 31 مارس ما هما لازم يختلفوا برضة امال حيقلدونا لية من الهنا اللى احنا فية وبالنسبة ليهم دة يوم يمثل المرح والسعادة وروح الدعابة مش احنا اللى بيبقى غلاسة وغتاتة وممكن الواحد يروح فيها من الفجعة بتاعة الخبرمش قادرة اقولكوا كمية الفجعة والخضة اللى انا اخدتها اليومين اللى فاتوا بسبب كدبة ابريل ناس تقولى الحقى واحدة صاحبتك فى المستشفى وواحدة صاحبتى باباها اتصل بيها وقالها انا راجع من السفر النهاردة واعلنت حالة الطوارىء فى البيت وخروجتنا باظت وبعد ساعتين اتصل وقال ان دى كدبة ابريل بعد ما اليوم كلة اتلخبط والخروجة كلها باظت وقعدنا نعيط انا وهيا جنب بعض من الغيظ............وحاجااااااات كتير بقى مش عايزة افتكرها الا مرارتى تتفقع وانا مش ناقصة .

المهم انى حاولت ادور على اصل الحكاية وقريت قصص كتير مفهمتش منها اى حاجة وحسيت اصلا انه موضوع سخيف مش المفروض اضيع وقتى فيه وانتوا عارفين ان الوقت من دهب المهم ان الناس عملت يوم للأحتفال بيوم يكدبوا فيه قال يعنى اصلا هما محتاجين يوم واحد للكدب ما كل الناس بتكدب كل يوم مية مرة بس اللى مش قادرة استوعبة ان واحد يقولى كل سنة وانتى طيبة النهاردة كدبة ابريل ياسلاااااااااااااااااااام بيقولى كل سنة وانا طيبة عشان بيكدب عليا سخافات وخرافات مش عارفة حنفوق منها امتى طيب يعملوا ايام للاحتفال بحاجات حلوة يعملوا عيد للأخلاص مثلا عيد للوفاء عيد للتسامح عيد لحب مصر مش يوم للكدب احنا ناقصين بلاوى وسلاموز بقى عشان اخترع كدبة اقولها لاصحابى اشمعنى انا يعنى اللى مقولش

يلا عشان نضرب

2008-03-30T02:20:00.012+02:00

وانا ماشية فى الكلية فى أمان الله وقفونى ناس معرفهمش وكلمونى فى الاتى وكمان لما فتحت ايميلاتى لقيت فيها نفس الكلام وكان رد فعلى زى ما انا كاتبة كدة ( حاجة تتضحك ):-

إتفقت كافه القوي الوطنية في مصر علي أن يكون يوم 6 إبريل يوم إضراب عام في مصر ( زغرطوا ياولاد حنعمل اضراب )

يوم 6 إبريل خليك قاعد في البيت أوعي تنزل ( مش حننزل امال حنعمل اضراب ازاى واحنا قاعدين قدام التليفزيون )

ماتروحشي الشغل ماتروحشي الجامعه ماتروحشي المدرسة ماتفتحشي المحل ماتفتحشي الصيدليه ماتروحشي القسم ماتروحشي المعسكر

( يانهار أبيض مروحش كل دة امال حعيش لية ادعى ربنا ياخدنى احسن )

عايزين مرتبات تعيشنا عايزين نشتغل عايزين تعليم لأولدنا عايزين مواصلات أدمية عايزين مستشفيات تعالجنا عايزين دواء لأطفالنا عايزين قضاء منصف عايزين أمن وأمان عايزين حرية وكرامه عايزين شقق للعرسان ( ياحلاوة كل دة عايزينة وكل دة حيحصل عشان حتتضربوا يوم واحد بس والله يابلاش امال اية اللى انتوا مش عايزينة ؟مش عايزين رفع أسعار مش عايزين محسوبيه مش عايزين ظباط بلطجية مش عايزين تعذيب في الإقسام مش عايزين أتاوات مش عايزين فساد مش عايزين رشاوي مش عايزين إعتقالات مش عايزين تلفيق قضايا ( كمان لا بقى دة انتوا زودتوها اوى مش عيب الكلام دة لسة فاكرين تتكلموا بعد ما الحكاية زادت فيه طلبات تانية خلونى امشى بقى ؟ )

قول لأصاحبك مايروحوش الشغل همه كمان وخليهم يدخلوا الإضراب ( وانا مالى بقى مش كفاية حضرب انا لوحدى كمان حيضربوا معايا طيب والناس اللى متعرفش تتضرب تعمل اية ؟ )

بذمتكوا دة حل دة كلام ناس عاقلين مروحش الشغل مروحش الجامعة مش اشترى حتى دوا لبابا عشان يغيروا القوانين اللى فى البلد اصل كل دة حيتغير من يوم اضراب تفتكروا الناس الكبيرة دول مش عارفة المصايب اللى الشعب فيها ما هما عارفين كل حاجة مش محتاجين الناس تقف وتعمل اضراب عشان يحسوا على دمهم وهو احنا لما نتحرك نضر نفسنا احنا الاول طيب ما احنا لما مش نشترى احتياجتنا احنا اللى حنضر الاول قبل الحكومة انا مش عارفة الحل دة صح ولا غلط بس اهم حاجة فيه ان الناس حتحس انها بتعمل حاجة لانها بقت على حافة الانهيار بقى كل الناس فى مصر وانا منهم عندهم شعرة ساعة تروح وساعة تيجى ادعولنا نضرب كويس يوم الاضراب ويارب نضرب احنا مش ننضرب فى الاخر وانتوا عارفين من مين طبعا ً انا مقولتش حاجة انتوا اللى قولتة ..... سلاموز

بما انى امرأة اذن فأنا عالمية

2008-03-22T03:33:00.008+02:00

بمناسبة يوم المرأة العالمى مكتبة اسكندرية عملت مؤتمر كبير ضم ستات كتير ودكاترة كتير وكمان المحافظ ياجدعان شفت المحافظ اخيراً احمدك يارب المؤتمر دة حسسنى بقيمتى كست سألت نفسى ازاى الستات دى كلها وصلت للى هيا فيه دلوقتى الواحدة من دول كانت تتطلع تتكلم قدام الناس كلها وتقول كلام ولا بميت راجل ولا هاممها حد عجبونى اوى وكان نفسى اوصل زيهم بس قعدت افكر مع نفسى اكيد عشان هما يوصلوا لكدة كان وراهم راجل ساعدهم والرجالة اللى بتساعد دول قليلين اوى دلوقتى دول يادوب يجيبوا لنفسهم كوباية مية دة اذا عرفوا المية من السفن اب الراجل دايما عايز مراتة فى البيت دايما جواة مارد محبوس اسمة سى السيد بس ياعينى الزمن اللى احنا فيه حابسة فى القمم ومش عارف يطلع الراجل عايز الست تطبخ وتكوى وتخلف وتربى العيال وتخلى البيت نظيف وتكون اجتماعية وكمان بعد ما تعمل كل دة تبقى ست منعنشة كدة وتخلى الحياة لونها بمبى وتبقى حاطة الاحمر والاخضر ومستنياة لما يرجع من الشغل عشان تهشتكة وتدلعة وتقولة نفسك فى اية ياحواش ازاى بقى ست معاها راجل زى دة توصل لمؤتمر المرأة العالمى وتشوف المحافظ زييى لا يمكن طبعا عشان الست تبقى ناجحة فى اى حاجة فى الدنيا ان شالله فى بيتها لازم الراجل يقف جنبها والعكس كمان عشان الراجل يبقى ناجح لازم الست تقف جنبة الحياة الزوجية مش معركة دى تعاون بين طرفين وعشان ينجحوا لازم يفهموا انها تعاون يعنى هات وخد انا حامشى بقى جاتلى مكالمة من المحافظ اللى عايز اى حاجة منة يقولى دة بقى حبيبى الروح بالروح ههههههههههههه ...... سلاموز بقى

أنفصام فى الشخصية

2008-03-22T01:50:00.010+02:00

لية الناس عندهم انفصام فى الشخصية لية كل الناس كدة لية البنت برة البيت شيك اوى وحلوة اوى ومكياج كامل وبرفانات تتشم من اول الشارع والكعب اللى بيتكتك طول ما هيا ماشية واصلا لو رحتلها فجأة فى البيت حتلاقيها شعرها منكوش ولابسة نظارة ولبسها مكعبر نيجى للراجل بقى بنلاقية فى الشارع بجزمة اخر شياكة بتلمع نفسى اعرف بيلمعوها كدة ازاى وشعرة اخر شياكة ونفسى اعرف برضة ازاى مش بيهيش ولا يتنعكش طول ما هو برة البيت دة غير البدلة او القميص والكرافات وفى البيت بقى يبقى انسان تانى بنطلون البيجاما واقع وشعرة اتنكش وعمال ياكل ويتفرج على قناة الجزيرة ....

كل كلامى دة على المظاهر ودة كان مثال صغير على اللى حقولة بعد كدة زى ما الراجل والست بيحاولوا يتجملوا قدام الناس فى الشكل كمان بيتجملوا فى المضمون حديكوا مثال لما الواحد يكون قدام الناس مثال للرجولة والشهامة والذوق والاخلاق زى الناس اللى يفتحوا للبنت الباب ويجيبولها الفطار لحد عندها فى الشغل ويساعدوها على الفاضى والمليان اللى يشوفهم يقول ياسلام ناس صحيح بتحترم الست اية الذوق والجمال دة كلة واقول لنفسى ياسلام لو واحد يرزقنى بواحد حليوة زى الناس دول ويبتدى الحقد يشتغل بقى والدعوات كمان يمكن تكون السما مفتوحة والاقى واحد اخلاق كدة قدامى ... بس تعالى شوفة فى البيت بقى وشوف الاحترام اللى للست عامل ازاى بيزعق فى اخواتة الغلابة والتكشيرة على وشة طول اليوم زى بالظبط الواحد اللى متجوز وبرة البيت شخصية وجوة البيت شخصية تانية خالص والست كمان نفسى اعرف لية الواحد مش يمشى بشخصية واحدة ولا لازم التغيير فى دى كمان يعنى لما واحد يبقى جنتل مان فى شغلة ومع اى واحدة ست برة البيت يبقى يكمل جميلة بقى وياخد ثواب ويعامل الناس اللى فى بيتة كمان بجنتلة يعامل اخواتة البنات وباباة ومامتة ولا هما ملهمش نفس فى الجنتلة واللخبطة دى بتخلينى متلخبطة لانى مش بعرف اللى قدامى الا لما اشوف حياتة الشخصية والبيتوتية اصل انا حشرية بعيد عنكوا كفاية كدة بقى عندى زيارة للبنت جارتنا رايحة اشوفها فى البيت عاملة اية حعملها مفاجعة ..... سلاموز

أمى

2008-03-21T01:03:00.004+02:00

بكرة عيد الأم ودة يوم بشيل همة بصراحة فيها اية لما اقول لماما كل سنة وانتى طيبة واجيب وردة من ام جنية دى من غير هدية انا مفلسة ياناااااااس والمشكلة انى مش بجيب لماما بس بجيب للناس كلها خدوا عندكوا طنطاتى وعماتى وخالاتى وكمان بابا عشان حرام يقعد من غير هدية اصل انا برضة بحبة وبعدين مالوش عيد أب هو كمان معرفش الكوسة اللى فى البلد دى حتى الاب مظلوم وكمان مافيش عيد للأبناء كمان احنا مظلومين مش كفاية مش لاقين شغل كمان ملناش عيد وكمان المفروض يعملوا عيد للبطالة وعيد للبنات المكتئبات وتبقى السنة كلها اعياد وهدايا والناس تفلس بقى وناخد الهدايا ونبيعها فى سوق التلات ... سبكوا انتوا مافيش اجمل من الام ربنا يخليها ليا نفسى اجيبلها الدنيا كلهابحبها كتير اوى جدا خالص مالص بس ياريت حد يسلفنى ...... وسلاموز

جولة

2008-03-21T00:08:00.009+02:00

فى قعدة صفا مع نفسى وفى ساعة ملل وفراغ رهيب قلت يابت ياسوسو تعملى اية تعملى اية لقيت نفسى فتحت اللاب توب بتاعى وقلت اشوف حاجة مفيدة اعملها طقت فى دماغى كدة مرة واحدة انى اكتب وانا لما تتطق فى دماغى حاجة لازم اعملها قلت اعمل مدونة اشمعنى انا يعنى اللى وقعت من قعر الافة حعمل مدونة يعنى حعمل مدونة ما في ناس كتير بتعمل وبيعملوا كتب كمان وانا بعيد عنكوا حتة المنافسة دى عندى من زمان لازم احشر مناخيرى فى اللى ماليش فيه بس بصمم عشان يبقى ليا فيه قلت اجرب مش حخسر حاجة اهو كلة كلام وفضفضة والسلام ودخلت اعمل مدونة وطبعا بعد الفحص والتدقيق عرفت كل التفاصيل عشان تتطلع شكلها حلو ويدخل دماغى ويفتح نفسى انى اكتب اصل انا نفسى عالطول مسدودة ... بس قبل ما اكتب قلت اعمل جولة على المدونات والناس الحريفة اللى بيكتبوا وعملت جولة ووسرحت وادخل واطلع لناس معرفهاش ولا قريت ليها قبل كدة وبجد اعجب بيهم كلهم كل واحد ليه افكارة واهدافة اللى كتب عشانها بس انا هدفى الوحيد انى كنت عايزة اكتب فى اى حاجة فى اى وقت ولقيتهم كاتبين فى كل حاجة حتى السياسة عجبونى اوى ونفسى ابقى زيهم كل واحد فيهم بقى قدوة ليا بس يارب ابقى مدونة كبيرة زيهم كدة وابقى خسارة فى البلد دى .... وسلاموز بقى

كلة ضرب ضرب مافيش شتيمة

2008-03-20T22:10:00.007+02:00

عايزة اتكلم فى حاجة نقطانى .. حتقولولى اية .. حقولكوا انا .. التليفزيوووووووون نفسى اتفرج على حاجة رومانسية ياناااااااااااااس مش لاقية حاجة اعيط فيها غير فيلم تيتانيك اللى مش بيجى غير فى المناسبات السعيدة حتى فى يوم الفلانتين مجابوش فيلم رومانسي ولو جابوا لازم البطل يموت او البطلة تروح فى داهية فين ياناس الاحضان الدافئة فين الكلمات الشاعرية مش لاقية كل ما اشوف قناة الاقى فيها فيلم ضرب ضرب ضرب وكل الافلام رعب واماكن ضلمة واشكال مكعبرة فين الناس الامامير الحلوين فين فين فين تعبت بقى عايزة فيلم رومانسى نفسى اعمل قناة اخليها كلها رومانسي فى رومانسى عشان الناس اللى قلوبهم اتحجرت دول تتفك شوية وياريت افلام الضرب اللى بيشوفوها الناس دى بتعلمهم حاجة كل واحد بيجرى ويقول يافكيك لو دخل فى مناقشة بس مع واحد بعضلات ... ناس غريبة .. خليكوا رومانسيين بقى .. وسلاموز

اخوووووويا مطلعش من البيضة

2008-03-20T05:22:00.013+02:00

اخووووووووووويا بيعمل كبير ياجدعان

اخويا المفعوص اللى مطلعش من البيضة بيزعق ويشخط فى البيت فاكر نفسة سى السيد حضرتة

تقولولى لية بيزعق كدة اقولكوا انا بقى اصل الموضوع كبير هو اصلا اتربى على كدة بابا كل شوية يقولة اية

انت راجل البيت ؟؟ نعم نعم ياسى بابا البتاع دة يبقى راجل البيت وهو اصلا اصغر منى بعشر سنين البتاع دة يزعقلى انا

نفسى اصرخ فيهم كلهم واقولهم فى وشهم انا غيييييير كل البنات مش حستسلم مش حنسلم مش حنبيع مش حنوافق عالتقطيع على رأى عادل امام فى فيلم مش عارفة اسمة ..

الرجولة ياجدعان مش تحكم مش سيطرة الرجولة شهامة وشخصية صح واراء مفيدة ونصايح سعيدة فكرتونى بأعلان زمان وانا صغيرة كنت بتفرج عليه بيقول " الراجل مش بس بكلمتة الراجل برعايتة لبيتة وأسرتة " يارب يااخويا تتطلع زية وتراعينا والتربية المتناقضة دى متجيش فوق دماغنا ادعوا معانا نردهالكوا وقت زنقة ان شاء الله ...... وسلاموز

انا غير كل البنات بجد ولا كدة وكدة

2008-03-19T23:37:00.013+02:00

انا غير كل البنات .......... نفسى اعرف لية بقى
انا فى رأيى انى بنت عادية جدا زى اى بنت فى الدنيا بس بحاول ابقى غير كل البنات بحاول الاقى لنفسى حاجة اتميز فيها وبصراحة دى حاجة صعبة اوى فى البلد دى بلد متعبة صحيح الناس بتاخد من المظاهر عشان ابقى غير كل البنات لازم اتميز فى حاجة وبصراحة جربت اتميز فى التعليم بس برضة للأسف مطلعش تعليم طلع بطيخ ...صحيح انا نفسى فى البطيخ هو راح فين بقالى كتير مش شوفتة ما علينا كنا بنقول اية ؟؟ اة فى البطيخ قصدى فى التعليم منفعتش اتميز فيه قلت اشوفلى حاجة تانية اعك فيها دخلت فى كورسات واخدت كورسات كتير لما قربت اعلن عن افلاسى وبرضة مافيش فايدة مش لاقية نفسى فى حاجة جربت اتميز فى الطبيخ قلت يمكن لما اللى مامتة دعيالة قصدى العريس يجى اكون بعرف اعمل حاجة جربت اطبخ وعينكوا ما تشوف الا النور لخبطت الدنيا بس الحمدلله بعرف اعمل نسكافية وكابتشينو كفاية علية كدة بس الحاجة الوحيدة اللى تقريبا نجحت فيها هيا الصداقة ربنا يخليلى اصحابى الحلوين هما اللى فى الاخر عارفين قيمتى وعارفين انا لية غير كل البنات بس للأسف مش عايزين يقولوللللللى ياترى حد فيكوا يعرف ؟؟؟؟؟

عيد ميلادى فات فات وفى ديلة سبع لفات

2008-03-19T23:29:00.014+02:00

النهاردة كان عيد ميلادددددددددددددى كل سنة وانا طيبة كملت بعيد عن السامعين اربعة وعشرين سنة حاسة انى كبرت اوى مع انى طفلة اوى اوى اوى بس الناس هيا دايما اللى تحسسنى انى كبيرة مش عارفة لية حاقديين عليا لية مش عارفة نفسى يسبونى اعيش حياتى اشمعنى الولد مش بيسألوا فى سنة يمكن عشان انا مش اتجوزت لحد دلوقتى والناس بدل تقولى كل سنة وانتى طيبة تقولى عقبال العريس !!!!

عرييييييييييييييييييس اية دلوقتى انا عايزة احتقل بعيد ميلاااااااادى هاتولى التورتة والحاجة الساقعة قال عريس قال نفسى اتسددت

حسسونى انى عنست بدرى الناس دى مبقتش عارفة اية اللى يرضيها اجيب اى واحد من الشارع واتجوزة واخلص عشان اسكتهم ياناس انا عايزة اتجوز صح مش عايزة اتجوز وخلاص افهموها بقى احنا بقينا فى سنة 2008 وبقى عندى 24 سنة وعايزة احتفل بعيد ميلادى انا عازماكوا بقى تبقوا تعالى ؟؟ ومتنسوش تجبولى عريس هههههههههههههههه